రాష్ట్రీయ గ్రామ్ స్వరాజ్ అభియాన్- గ్రామీణాభివృద్ధి.

ప్రతి దేశ ప్రజాస్వామ్య ప్రభుత్వాలు తమ ప్రజల అభ్యున్నతి కొరకు వివిధ అభివృధ్ది పథకాలను ప్రకటించడం సహజం. అందులో వ్యక్తిగత అభివృధ్దికి ఉద్దేశించినవి మరియు సామాజికాభివృధ్దికి ఉద్దేశించినవి అనే రెండు రకాల పథకాలు ఉంటాయి. అలాగే మన దేశములో కూడా మన కేంద్ర ప్రభుత్వము దేశ పౌరుల అభివృద్ధి కొరకు, కూడా వివిధ రకాల పథకాలను ప్రకటించి వాటిని అమలు చేయుచున్నది. అందులో ప్రజలకు కావలిసిన మౌళిక వసతుల కల్పన కొరకు బాద్యత వహించు స్థానిక ప్రభుత్వాలు అయిన పంచాయతీలకు, కావలసిన నిధులను సమకూర్చుట కొరకు కేంద్ర ప్రభుత్వము ప్రకటించి అమలు చేయుచున్నపథకము వేరే “రాష్ట్రీయ గ్రామ్ స్వరాజ్ అభియాన్”.

ఈ పథకము అమలుకు కావల్సిన నిధులను 60% కేంద్రం, 40% రాష్ట్రాలు భరించాలని నిబందన. అదే ఈశాన్య రాష్ట్రాలకు మాత్రం కేంద్ర రాష్ట్రాల వాటాల నిష్పత్తి 90% మరియు 10%. ఈ పథకములో నిధులను రెండు విడతలుగా కేంద్రం విడుదల చేస్తుంది. కేంద్రం విడుదల చేసిన నిధులకు రాష్ట్ర వాటాగా 40%, ఈశాన్య రాష్ట్రాలయితే 10% నిధులను కలిపి ఈ పథకం అమలు చేయాల్సి ఉంటుంది. రాష్ట్ర వాటాగా నిధులను కేటాయించని రాష్ట్రాలకు రెండవ విడత నిధులను కేంద్రం విడదల చేయదు.

ఈ పథకములో రెండు బాగాలు ఉన్నాయి.

• గ్రామాలలో మౌళిక వసతుల కల్పన. ( పంచాయతి కార్యాలయము ఏర్పాటు చేయుటకు తగిన వసతి లేనియెడల నూతన భవన నిర్మాణము, భవన మరమ్మత్తులు మరియు అంతర్జాల సేవలు అందించటకు కావల్సిన సంఘణకాలు (కంప్యూటర్ తదితర పరికరాలు) సమకూర్చడం.
• స్థానిక ప్రభుత్వాలకు ఎన్నికైన ప్రజా ప్రతినిధులకు మరియు అందులో పనిచేయుచున్న ఉద్యోగులకు సామర్థ్య పెంపుదలకు కావల్సిన శిక్షణ అందించడం. ఇందులో అతిముఖ్యమైనదేమిటీ అంటే, స్థానిక ప్రభుత్వాలకు ఎన్నికైన ప్రజా ప్రతినిధులందరికీ ఆరు నెలల లోగా పంచాయితీ పరిపాలన విధానాల గురించి, ప్రాథమిక శిక్షణ అందించడం మరియు రెండు సంవత్సరాలకు పరిపాలనలో తమకు ఎదురైన సమస్యల పరిష్కార విధానాలపై పునఃఛ్ఛరణ(రిఫ్రెషర్) శిక్షణ అందించడం.

వాస్తవంగా ఈ పథకము గత దశాబ్ద కాలంగా అమలవుతున్న పథకమే అయినప్పటికి దీనిని 2016-17లో “రాష్ట్రీయ గ్రామ్ స్వరాజ్ అభియాన్” గా పేరు మార్చి 31 మార్చి 2022 వరకు అమలు చేయాలి అసకున్న అనుకున్న కేంద్రం, దీని ద్వార వస్తున్న సత్ఫలితాలను చూసి మరి కొంత కాలం అనగా 31 మార్చి 2026 వరకు పొడగించడం అభినందనీయము.

ఈ పథకము యొక్క ముఖ్య ఉద్దేశము

• సుస్థిర అభివృద్ధి లక్ష్యాలను సాదించడానికి పంచాయతీరాజ్ సంస్థల యొక్క పాలనా సామర్థ్యాలను అభివృద్ధి చేయడం.
• అందుబాటులో ఉన్న వనరులను సముచితంగా వినియోగించుకోవడంపై దృష్టి సారించి, సమ్మిళిత స్థానిక పాలన కోసం పంచాయతీల సామర్థ్యాలను మెరుగుపరచడం.
• జాతీయ ప్రాముఖ్యత కలిగిన సమస్యలను పరిష్కరించడానికి ఇతర పథకాలతో సమన్వయం చేయడం.
• పంచాయితీలు తమ స్వంత ఆదాయ వనరులను పెంచుకునే సామర్థ్యాలను పెంపొందించుకోవడం కొరకు తగిన అవగాహన కల్పించడం.
• పంచాయతీ వ్యవస్థలో ప్రజల భాగస్వామ్యం, పారదర్శకత మరియు జవాబుదారీతనం పెంపొందించడానికి గల ప్రాథమిక వేదికగా ఉన్న ఒకే ఒక వేదికైన గ్రామసభలను సమర్థవంతంగా పనిచేయడానికి బలోపేతం చేయడం.
• రాజ్యాంగం మరియు PESA చట్టం 1996 స్ఫూర్తి ప్రకారం పంచాయతీలకు అధికారాలు మరియు బాధ్యతల వికేంద్రీకరణను ప్రోత్సహించడం.
• పంచాయతీరాజ్ సంస్థల కోసం సామర్థ్య పెంపు కొరకు తగిన శిక్షణ అందించడానికి మరియు సముచిత సలహాలను అందించడానికి (హ్యాండ్‌హోల్డింగ్‌కు) మద్దతు ఇవ్వడానికి అత్యుత్తమ సంస్థల సమాహారముల (నెట్‌వర్క్)ను అభివృద్ధి చేయడం.
• వివిధ స్థాయిలలో పంచాయతీరాజ్ సంస్థల సామర్థ్యాన్ని పెంపొందించడానికి సంస్థలను బలోపేతం చేయడం మరియు వాటిని తగిన నాణ్యతా ప్రమాణాలను సాధించేలా చేయడం.
• మౌలిక సదుపాయాలు, సౌకర్యాలు, మానవ వనరులు మరియు ఫలితాల ఆధారిత శిక్షణ.
• పరిపాలనా సామర్థ్యం మరియు మెరుగైన సర్వీస్ డెలివరీ కోసం పంచాయితీలలో సుపరిపాలనను ప్రారంభించడానికి ఇ-గవర్నెన్స్ మరియు ఇతర సాంకేతిక ఆధారిత పరిష్కారాలను ప్రోత్సహించడం.
• పనితీరు ఆధారంగా పంచాయతీరాజ్ సంస్థల ను గుర్తించి, ప్రోత్సహించడం.

Contd.Page.2

Page.No.2

గత సంవత్సరము పార్లమెంట్ సభ్యులు అడిగిన ప్రశ్నకు సమాదానము గా కేంద్ర పంచాయతీరాజ్ సహాయ మంత్రి శ్రీ కపిల్ మోరేశ్వర్ పాటిల్ గారు రాష్ట్రాలకు మరియు కేంద్ర పాలిత ప్రాంతాలకు గత మూడు సంవత్సరాలకు అనగా 2018-19 నుండి 2020-21 వరకు కేంద్రము విడుదల చేసిన వివరాలను తెలియ చేసారు. దాని ప్రకారము అన్నిటి కన్నా ఎక్కువగా ఉత్తర్ ప్రదేశ్ కు రూ. 259.6001 కోట్లు, దాని తరువాత స్థానంలోమధ్య ప్రదేశ్ కు రూ. 219.69 కోట్లు విడుదల కాగ, దాద్రా&నగర్ హవేలి, డామన్&డయ్యు, గోవా, గుజరాత్, లక్షద్వీప్, పుదుచ్చేరి లాంటి వాటికి ఒక రూపాయి కూడ విడుదల కాలేదు. తెలుగు రాష్ట్రాలైన ఆంధ్ర ప్రదేశ్ కు రూ. 90.029 కోట్లు తెలంగాణ కు 12 కోట్లు మాత్రమే గత మూడు సంవత్సరాలలో నిధులు విడుదల చేయడం జరిగింది.

కేంద్ర నిధుల విడుదల సరళిని గమనిస్తే, ఈ పథకమును అమలు చేయటకు చొరవ చూపి, కేంద్ర నిధుల (60%) తో పాటు తమ రాష్ట్ర వాటా (40%) నిధులను విడుదల చేయడం ద్వార దేశములోని పలు రాష్ట్రాలలోని, చాలా పంచాయతీలు మౌళిక వసతుల కల్పన వరంగా గాని అధునాతనమైన సాంకేతిక పద్ధతులలో సేవలు అందించడంలో చాలా అభివృద్ధిని సాదించాయి. అలాగే తమ రాష్ట్రాల లోని పంచాయతీలకు ఎన్నికైన ప్రజా ప్రతినిధులకు, స్థానిక ప్రభుత్వాల్లో పనిచేయు ఉద్యోగులకు వారి సామర్థ్య పెంపుదలకు తగిన శిక్షణను కూడా అందించడము జరుగు చున్నది. దీని వలన సుశిక్షితులైన పంచాయతీ కార్యవర్గము తమ ప్రజలకు మెరుగైన సేవలను అందించ గలవు అనుటలో ఎలాంటి సందేహము లేదు.

ఈ పథకములో నిధులు పొందుటకు ప్రతిపాదనలు పంపు బాద్యత రాష్ట్ర ప్రభుత్వము పై ఉండడము, రాష్ట్రాలకు, కేంద్రం 60% నిధులను విడుదల చేయడం, కేంద్రం విడుదల చేసిన నిధులకు సరిపడ 40% నిధులను రాష్ట్ర వాటాగా కలిపి పథకం అమలు చేయాలి అనే నిబందన కారణంగా, రాష్ట్ర వాటాగా ఈ పథకము అమలుకు నిధులను కేటాయించని రాష్ట్రాలకు, కేంద్రం మరో విడత నిధులను విడదల చేయదు. ఈ కారణంగా ఏ రాష్ట్రమైతే తమ వంతు వాటాను కేటాయించలేదో ఆ రాష్ట్రములోని పంచాయతీలకు ఈ పథకము ద్వార అందవలిసిన అభివృధ్ది నిధులు ఆగి పోవడమే గాక, ఎన్నికైన ప్రజాప్రతినిధులకు అలాగే కార్యవర్గమునకు అందించాల్సిన సామర్థ్య పెంపు శిక్షణకు కావల్సిన నిధులు కూడా విడదల కాకపోవడం మూలంగా తగిన శిక్షణ అందించలేని రాష్ట్రాల లోని పంచాయతీలు ఆశించినంత అభివృద్ధి ని సాదించలేక పోతున్నాయి. ఇలాంటి పరిస్థితులు దేశములోని పలు రాష్ట్రాలలో ఉన్నాయి అని నిధుల విడదలకు సంబంధించిన ప్రశ్నకు కేంద్ర పంచాయతీ రాజ్ శాఖ సహాయ మంత్రి గారు ఇచ్చిన సమాదానమే నిదర్శనము.

ఇలాంటి పరిస్థితుల లో “రాష్ట్రీయ గ్రామ్ స్వరాజ్ అభియాన్” పథకము ద్వారా కేంద్ర ఆశించిన సంపూర్ణ ఫలితాలు వస్తాయి అనుకోవడం భ్రమ మాత్రమే అవుతుంది. దేశాభివృద్ధి, గ్రామాల అభివృద్ధి పై ఆధారపడి ఉన్నదన్న విషయము అందరకీ తెలిసినదే. గ్రామాభవృధ్ధి జరగాలంటే మానవ వనరుల అభివృద్ధి జరగాలి. మానవ వనరుల అభివృద్ధికి వారి సామర్థ్య పెంపుదలకు కావల్సిన శిక్షణ జరగాలి. సుశిక్షితులైన మానవ వనరులు లేనిదే గ్రామాల అభివృధ్దిని ఆశించడం ఎండ మావులలో నీరు త్రాగాలనుకోవడమవుతుంది.

ఈ పథకము అమలు ద్వార ఆశించిన సంపూర్ణ ఫలితాలు రావాలంటె మొత్తం వందశాతం నిధులు కేంద్రమే విడుదల చేయాలి (భరించాలి). లేదా పంచాయతీలకు ఎన్నికైన ప్రజా ప్రతినిధులకు ఉద్యోగుల సామర్థ్య పెంపుదలకు కావల్సిన నిధులను, రాష్ట్ర ప్రభుత్వాలు తమ వాటా నిధులను తప్పనిసరిగా కేటాయించేలా పార్లమెంట్ ద్వారా సమగ్ర చట్టం తీసుకు రావాలి.

Pages: 1 2